Expedition Norge på tvers

Fastlandet var ikkje kryssa før vi stod i saltvatn, først då kunne vi sei at ”Expedition Norge på tvers” var fullført!

Sommarferien nærma seg, og skyttaren hadde kunngjort tidleg at noko landsskyttarstemne vart det ikkje med han i år (Bodø). Dette tolka eg slik at han no var open for andre forslag. Sekretæren er ein ivrig lesar av bøker og blad om fjellturar og lange ekspedisjonar. Har nok ein draum i meg om ein lengre tur. I sommar dukka det opp eit blad saman med Fjell og vidde, Fjellturer i Midt-Norge, der i blant ein tur som heitte “Norge på tvers”. Har du ein ekspedisjonsdraum, da er denne turen noko å starte med, stod det med store bokstaver! Bladet vart lagt fram for skyttaren og han vart og litt fenga. Turen var opplagt å gå frå Stjørdal til svenskegrensa ved Sylsjøen på 7 dager. Vi planla å bruke 5 dager, og i tillegg gå i motsett retning. For å få registrert turen måtte vi kjøpe ekspedisjonspass hos Trondheim turistforening, og så registrere kodeord ved start og mål og på alle hyttene. Desse skulle sendast til Trondheim turistforening etterpå, og vi ville bli registrert på lista Norge på tvers, samt få t-skjorte og drikkekopp! Og får folk betale nokre hundre kroner, og blir lokka med t-skjorte i premie, blir vi visst med på kva som helst.

Kort om turen:

Dag 1 (måndag) buss Stjørdal – Stugudal/Tydal kommune, deretter gåing Sylsjøen (Sverige) – Nedalshytta 23 km. Ved Sylsjøen fann vi første kodeordet, og sjølve turen vestover starta. Først 5 km til Nedalshytta, med dusj og 3 rettars middag, og kodeord nr 2. Sylane er eit flott område med mange høge fjelltoppar som Storsylen og Storsola, og det kribla i føtene til sekretæren etter å bestige desse. Heldigvis var det tåke på toppane neste dag, og dermed ikkje så fristande! Men Sylane er vel verdt eit besøk igjen.

Dag 2 Nedalshytta (ca 750 moh) – Storerikvollen 22 km. Var oppe i ca 1000moh denne dagen, det høgste på turen. Lett terreng, men mykje mygg. Heldigvis blåste det ein del, og det holdt myggen vekke. På Storerikvollen venta og dusj og 3 rettars middag. Her snakka vi med ein kar som gjekk ”Norge på langs”, og hadde sett av 4mnd til det. Han var pratesjuk og saltsjuk, måtte innom og kjøpe seg chips og pils, men han og hunden skulle gå lenger før dei slo opp teltet. Dette var siste betjente hytta på turen, så heretter vart det å lage maten sjølv!

Dag 3 dobbeletappe Storerikvollen – Ramsjøhytta – Schulzhytta 34 km. Starta i bra tempo på grusveg, men etter 1 km trudde skyttaren at turen var over, for brått stupte sekretæren framover og slo ansiktet i grusen, forsterka av sekken. Kutt i leppa, skrubbsår og blåmerke både på hake og kjake. Det første eg gjorde var å sjekke at tennene var heile og deretter at ikkje noko var brote. Tennene var viktigast, og det var like før eg ringde Rolf for hjelp. Det verste blodet vart vaska vekk med drikkevatnet og antiseptiske servietter. Deretter var det berre å fortsette i høgt tempo. Grunnen til fallet? Løkka på skoreima hekta seg inn på ei hekte på den andre skoen! Eg knyter ikkje løkker lenger! På Schultzhytta var vi faktisk 3 stk av totalt 15 fra Sykkylven som overnatta!

Dag 4 Schulzhytta – Prestøyhytta – Kvitfjellhytta 28 km. Vi møtte ein del folk i same ærend som oss, i motsett retning austover, og dei fleste lurte på kva eg hadde gjort meg i ansiktet.

Dag 5 Kvitfjellhytta – Stjørdal 31 km. Vi var komne ned i furuskogen og blautt myrterreng, som var tungt å gå i. Heldigvis ikkje fleire uhell på turen. Stien enda i nærleiken av Hegra festning, og her var det asfalt og på med joggeskoa, ein herleg følelse! No var det 1 mil på asfalt og kanskje den hardaste etappa, stivna veldig i føtene. Siste kodeord fann vi i vindauget til Tronheim turistforening sin butikk i Stjørdal.

Interesserte finn meir info på www.norgepaatvers.no